ചെന്നൈ: തമിഴ്നാട്ടിലെ ക്ഷേത്രങ്ങളില് ഫോണ് ഉപയോഗിക്കുന്നതിന് വിലക്ക്. മദ്രാസ് ഹൈക്കോടതിയുടേതാണ് ഉത്തരവ്. ക്ഷേത്രപരിസരത്ത് വിശുദ്ധിയും പവിത്രതയും കാത്തുസൂക്ഷിക്കണമെന്ന് ചൂണ്ടിക്കാട്ടിയാണ് മധുര ബെഞ്ചിന്റെ വിധി.
തൂത്തുക്കുടി ജില്ലയിലെ തിരുച്ചെന്തൂര് സുബ്രഹ്മണ്യ സ്വാമി ക്ഷേത്രത്തിനുള്ളില് മൊബൈല് ഫോണ് നിരോധിക്കണമെന്ന് ആവശ്യപ്പെട്ട് എം സീതാരാമന് സമര്പ്പിച്ച പൊതുതാല്പര്യ ഹര്ജിയിലാണ് കോടതി ഉത്തരവ്. ജസ്റ്റിസ് ആര് മഹാദേവന്, ജെ സത്യനാരായണ പ്രസാദ് എന്നിവരടങ്ങിയ ഡിവിഷന് ബെഞ്ചാണ് ഹര്ജി പരിഗണിച്ചത്. ഭക്തര് ഫോണുകളില് വിഗ്രഹങ്ങളുടെയും പൂജകളുടെയും ഫോട്ടോകള് പകര്ത്തുന്നുവെന്നും ഇത് നിരോധിക്കണമെന്നുമായിരുന്നു ഹര്ജി.
മൊബൈലുകള് ഉപയോഗിച്ച് ക്ഷേത്രത്തിലെ വിലപിടിപ്പുള്ള വസ്തുക്കളുടെ ഫോട്ടോകള് എടുക്കുന്ന സംഭവങ്ങളും ഉണ്ടാകുന്നുണ്ടെന്നും ഇത് സുരക്ഷയെ അപകടത്തിലാക്കുന്നുണ്ടെന്നും ഹര്ജിയില് ചൂണ്ടിക്കാട്ടിയിരുന്നു. മാത്രമല്ല ഭക്തരായ സ്ത്രീകളുടെ സമ്മതമില്ലാതെ അവരുടെ ഫോട്ടോ എടുക്കാന് സാധ്യതയുണ്ടെന്നും അത് ദുരുപയോഗം ചെയ്യപ്പെടുമെന്ന ആശങ്ക ഉണ്ടെന്നും ഹര്ജിയില് പറഞ്ഞിരുന്നു.
ക്ഷേത്രങ്ങള് വളരെ മഹത്തരമായ ഇടങ്ങളാണ്. ജന ജീവിതത്തെ സംബന്ധിച്ചുള്ള കേന്ദ്ര ബിന്ദു. ആരാധനാലയം എന്ന നിലയില് മാത്രമല്ല ജനങ്ങളുടെ സാമൂഹിക-സാംസ്കാരിക-സാമ്ബത്തിക ജീവിതത്തിന്റെ അവിഭാജ്യ ഘടകം കൂടിയാണവ. ക്ഷേത്രത്തിലെ ദൈവികതയും ആത്മീയതയും അനുഭവിക്കാന് ആഗ്രഹിക്കുന്ന ലക്ഷക്കണക്കിന് ഭക്തരെ ആകര്ഷിക്കുന്നതും ഈ ഘടകങ്ങളാണ്. അതുകൊണ്ട് തന്നെ ഇത്തരം കാര്യങ്ങളെല്ലാം ക്ഷേത്രങ്ങളില് ഉണ്ടെന്ന് ഉറപ്പാക്കേണ്ടതുണ്ട്’, കോടതി ഉത്തരവില് പറഞ്ഞു.
ഭരണഘടനയുടെ 25 -ാം അനുച്ഛേദം അനുസരിച്ച് എല്ലാ വ്യക്തികള്ക്കും സ്വതന്ത്രമായി മതത്തില് വിശ്വസിക്കാനും ആചരിക്കാനും പ്രചരിപ്പിക്കാനും അവകാശമുണ്ടെന്ന കാര്യം അംഗീകരിക്കുന്നു. എന്നിരുന്നാലും അവ നിയന്ത്രണങ്ങള്ക്ക് വിധേയമാണ്. ക്ഷേത്രത്തിന്റെ ആരാധനാ കാര്യങ്ങളില് മര്യാദയും പവിത്രതയും കാത്ത് സൂക്ഷിക്കുന്നുണ്ടെന്ന് ക്ഷേത്ര അധികാരികള് ഉറപ്പാക്കണമെന്നും കോടതി വ്യക്തമാക്കി.
