ചെന്നൈയിലെ ക്യാബ് ഡ്രൈവറുടെ ബാങ്ക് അക്കൗണ്ടിലേക്ക് അബദ്ധത്തില് എത്തിയത് 9000 കോടി രൂപ. എസ്എംഎസിലൂടെയാണ് പഴനി നെയ്ക്കരപ്പട്ടി സ്വദേശിയായ രാജ്കുമാര് തന്റെ ബാങ്ക് അക്കൗണ്ടില് കോടികള് നിക്ഷേപിക്കപ്പെട്ടുവെന്ന വിവരം അറിഞ്ഞത്.
തമിഴ്നാട് മെര്ക്കന്റൈല് ബാങ്കില് നിന്നാണ് അക്കൗണ്ടിലേക്ക് 9,000 കോടി രൂപ ക്രെഡിറ്റ് ആയതെന്ന് ഇന്ത്യ ടുഡേ റിപ്പോര്ട്ട് ചെയ്തു.
അതുവരെ രാജ്കുമാറിന്റെ അക്കൗണ്ടില് 105 രൂപ മാത്രമാണുണ്ടായിരുന്നത്. തട്ടിപ്പാണെന്നാണ് രാജ്കുമാര് ആദ്യം കരുതിയിരുന്നത്. സ്ഥിരീകരിക്കാനായി സുഹൃത്തിന് 21,000 രൂപ അയച്ചുകൊടുത്തു. പണം സുഹൃത്തിനു കിട്ടി. ശേഷം മണിക്കൂറുകള്ക്കുള്ളില് തമിഴ്നാട് മെര്ക്കന്റൈല് ബാങ്കിന്റെ ഹെഡ് ഓഫീസ് പ്രവര്ത്തിക്കുന്ന തൂത്തുക്കുടിയില്നിന്ന് രാജ്കുമാറിന് ഫോണ് വിളിയെത്തി. 9,000 കോടി രൂപ അബദ്ധത്തില് നിക്ഷേപിച്ചതാണെന്നും അറിയിച്ചു. ബാങ്ക് രാജ്കുമാറിന്റെ അക്കൗണ്ടില്നിന്ന് തുക പിന്വലിക്കുകയും ചെയ്തു.
ശേഷം ബാങ്കിന്റെയും രാജ്കുമാറിന്റെയും അഭിഭാഷകര് ചെന്നൈ ത്യാഗരായ നഗറിലുള്ള ബാങ്കിന്റെ ശാഖയിലെത്തി ഒത്തുതീര്പ്പിലെത്തി. 9000 കോടി രൂപയില്നിന്ന് പിന്വലിച്ച 21,000 രൂപ തിരികെ നല്കേണ്ടെന്നും വാഹന വായ്പ നല്കാമെന്നും ബാങ്ക് അറിയിച്ചതായി രാജ്കുമാര് പറഞ്ഞു.
