തമിഴ്നാട്ടിലെ മുന് ആരോഗ്യമന്ത്രിയും സിറ്റിങ് എം.എല്.എയുമായ ഡോ. വിജയ ഭാസ്കറിനെ കൊച്ചിയില് എന്ഫോഴ്സ്മെന്റ് ചോദ്യം ചെയ്യുന്നു. കേരളത്തിലെ പ്രമുഖ ജ്വല്ലറി ഉടമ പൊലീസില് നല്കിയ പരാതിയുടെ തുടര്നടപടിയായാണ് ഇ.ഡിയുടെ ചോദ്യം ചെയ്യല്. എം.ഐ.ഡി.എം.കെയുടെ എം.എല്.എയും മുന് സര്ക്കാറുകളില് ആരോഗ്യ മന്ത്രിയുമായിരുന്ന വിജയ ഭാസ്കറിനെതിരെ അനധികൃത സ്വത്ത് സമ്ബാദനത്തിന് നേരത്തെ വിജിലന്സ് കേസുണ്ട്.
ഷര്മിള എന്ന യുവതിക്കെതിരെ അങ്കമാലിയിലെ ഒരു ജ്വല്ലറി ഉടമ പൊലീസില് പരാതി നല്കിയിരുന്നു. ജ്വല്ലറിയില് നിന്ന് രണ്ടര കോടിയുടെ സ്വര്ണം വാങ്ങിയ ശേഷം പണം തരാതെ വഞ്ചിച്ചുവെന്നായിരുന്നു ജ്വല്ലറി ഉടമ നല്കിയ പരാതി. എന്നാല്, വന്കിട ഇടപാടുകാരെ ജ്വല്ലറിക്ക് പരിചയപ്പെടുത്തി കൊടുത്തയാളാണ് താനെന്നായിരുന്നു ഷര്മിള പൊലീസിനോട് പറഞ്ഞത്. വിജയഭാസ്കറിനെ ഇങ്ങിനെ ജ്വല്ലറിക്ക് പരിചയപ്പെടുത്തിയിട്ടുണ്ട്. വിജയ ഭാസ്കര് വാങ്ങിയ സ്വര്ണത്തിന്റെ കമീഷനായാണ് രണ്ടര കോടിയുടെ സ്വര്ണം ജ്വല്ലറിയില് നിന്ന് സ്വീകരിച്ചതെന്നായിരുന്നു ഇവര് പറഞ്ഞത്. രണ്ടര കോടി കമ്മീഷനായി ആവശ്യപ്പെടണമെങ്കില് എത്ര രൂപയുടെ സ്വര്ണം വിജയ ഭാസ്കര് വാങ്ങിയിട്ടുണ്ടാകുമെന്ന സംശയം കാരണമാണ് പൊലീസ് വിവരം ഇ.ഡിക്ക് കൈമാറുന്നതും ഇ.ഡി അന്വേഷണം തുടങ്ങുന്നതും.
