ഏഷ്യയിൽ ആദ്യം; മെറ്റാവേഴ്സിൽ വിവാഹം നടത്തി തമിഴ് ദമ്ബതികൾ

ചെന്നൈ: ഏഷ്യയിൽ ആദ്യം, മെറ്റാവേഴ്സിൽ വിവാഹം നടത്തി തമിഴ് ദമ്പതികൾ. ദിനേഷ് എസ് പി, ജനകനന്ദിനി രാമസ്വാമി എന്നിവരുടെ വിവാഹമാണ് ഫെബ്രുവരി ആറിന് തമിഴ്നാട്ടിലെ ചെറുഗ്രാമമായ ശിവലിംഗപുരത്ത് വെച്ച് മെറ്റാവേഴ്സിലൂടെ നടന്നത്. ലോകത്തിന്റെ വിവിധ ഭാഗങ്ങളിലുള്ള സുഹൃത്തുക്കൾക്കും ബന്ധുക്കൾക്കും വിർച്വൽ ലോകത്ത് വെച്ച് ദമ്ബതികളുടെ വിവാഹത്തിൽ പങ്കെടുക്കാനായി. വിർച്വൽ റിയാലിറ്റി, ബ്ലോക് ചെയിൻ സാങ്കേതിക വിദ്യകളുടെയെല്ലാം സഹായത്തോടെ സൃഷ്ടിച്ചെടുക്കുന്ന ത്രിഡി ലോകമാണ് മെറ്റാവേഴ്സ്.

അനുബന്ധ ഉപകരണങ്ങളുടെ സഹായത്തോടെ മെറ്റാവേഴ്സിൽ പ്രവേശിക്കുന്നവർക്ക് മറ്റുള്ളവരെ കാണാനും പരസ്പരം സംസാരിക്കാനും സാധിക്കും. എല്ലാവർക്കും സ്വന്തമായി അവതാറുകളും ഉണ്ടാവും.കോവിഡ് നിയന്ത്രണങ്ങളുടെ ഫലമായി വിവാഹച്ചടങ്ങുകൾക്ക് ആളുകളുടെ എണ്ണം പരിമിതപ്പെടുത്താൻ നിർബന്ധിതനായതോടെയാണ് നാട്ടിൽ വെച്ച് കുറച്ചുപേരെ പങ്കെടുപ്പിച്ച് വിവാഹം നടത്താനും റിസപ്ഷൻ വിർച്വലായി മെറ്റാവേഴ്സിൽ വെച്ച് നടത്താനും തീരുമാനിച്ചത് എന്ന് ദിനേശ് പറയുന്നു. വിവാഹം നിശ്ചയിച്ചപ്പോൾ തന്നെ മെറ്റാവേഴ്സിൽ വെച്ച് അത് നടത്തിയാലോ എന്ന് ചിന്തിച്ചിരുന്നു. അത് വധുവിനും ഇഷ്ടമായി എന്ന് ദിനേശ് പറയുന്നു.

കഴിഞ്ഞ ഒരു വർഷമായി ബ്ലോക് ചെയിൻ സാങ്കേതിക വിദ്യയിൽ പ്രവർത്തിക്കുന്നയാളാണ് ദിനേശ്. മാസങ്ങൾ നീണ്ട പരിശ്രമത്തിനൊടുവിൽ ടാർഡി വേഴ്സ് എന്ന സ്റ്റാർട് അപ് ആണ് റിസപ്ഷൻ നടത്തുന്നതിനുള്ള മെറ്റാവേഴ്സ് നിർമിച്ചെടുത്തത്. അതിഥികൾക്കും വധുവിനും വരനും വേണ്ടിയുള്ള അവതാറുകളും നിർമിച്ചു. വധുവിന്റെ മരിച്ചുപോയ പിതാവിന്റെ അവതാറും നിർമിച്ചിരുന്നു. മെറ്റാവേഴ്സിൽ നടന്ന ഈ വിവാഹ ചടങ്ങിന്റെ ചിത്രങ്ങളും വീഡിയോകളും സോഷ്യൽ മീഡിയയിൽ പങ്കുവെച്ചിരുന്നു. പരിപാടിയോടനുബന്ധിച്ച് ചെന്നൈയിൽ നിന്നു ഒരു സംഗീത പരിപാടിയും മെറ്റാവേഴ്സിൽ നടത്തി.വിവാഹത്തിന് വേണ്ടി പ്രത്യേക എൻഎഫ്ടിയും (നോൺ ഫൺജിപിൾ ടോകൻ) പുറത്തിറക്കിയിരുന്നു. ഗാർഡിയൻ ലിങ്ക് പുറത്തിറക്കിയ സ്പെഷ്യൽ എഡിഷൻ എൻഎഫ്ടികൾ ബിയോൻഡ് ലൈഫ്.ക്ലബ് മാർകറ്റ് പ്ലേസ് വഴി ലഭ്യമാണ്. ഐഐടി മദ്രാസിലെ പ്രൊജക്ട് അസിസ്റ്റന്റ് ആണ് ദിനേശ്. ക്രിപ്റ്റോ കറൻസി, ബ്ലോക് ചെയിൻ സാങ്കേതിക വിദ്യ എന്നിവയിൽ പ്രവർത്തിക്കുന്ന ദിനേശ് കഴിഞ്ഞ ഒരു വർഷമായി ക്രിപ്റ്റോകറൻസിയായ എഥീറിയം മൈനിങിലാണ്. മെറ്റാവേഴ്സിന്റെ അടിസ്ഥാന സാങ്കേതികവിദ്യയാണ് ബ്ലോക് ചെയിൻ.