പരിശോധന കർശനമാക്കി തമിഴ്നാട്, ദേശീയപാത പൂർണമായി അടച്ചു

കേരളത്തിൽ ഒമിക്രോൺ കോവിഡ് കേസുകൾ കൂടിയതോടെ സംസ്ഥാന അതിർത്തിയായ ചാവടിയിൽ തമിഴ്നാട് ഉദ്യോഗസ്ഥ സംഘം പരിശോധന കൂടുതൽ കർശനമാക്കി. ഇന്നലെ ബാരിക്കേഡുകൾ സ്ഥാപിച്ചു ദേശീയപാത പൂർണമായി അടച്ചു. തമിഴ്നാട്ടിലേക്കു പോവുന്ന വാഹനങ്ങൾ സർവീസ് റോഡിലൂടെ തിരിച്ചുവിട്ട് ഉദ്യോഗസ്ഥരുടെ പരിശോധനയ്ക്കു ശേഷം മാത്രമേ ഇന്നുമുതൽ കടത്തിവിടുന്നുള്ളു.

കോവിഡ് പ്രതിരോധ വാക്സീൻ 2 ഡോസ് പൂർത്തിയായ സർട്ടിഫിക്കറ്റോ ആർടിപിസിആർ നെഗറ്റീവ് സർട്ടിഫിക്കറ്റോ നിർബന്ധമാണ്. നിർദേശങ്ങൾ പാലിക്കാതെ എത്തുന്നവരെ വരും ദിവസങ്ങളിൽ മടക്കി അയയ്ക്കുമെന്നും കർശന നടപടികളിലേക്കു കടക്കുമെന്നും ഉദ്യോഗസ്ഥ സംഘം മുന്നറിയിപ്പുനൽകി കഴിഞ്ഞു . പൊലീസ്, ആരോഗ്യം, റവന്യു, തദ്ദേശ വകുപ്പുകൾ സംയുക്തമായുള്ള ടീമാണു പരിശോധനയ്ക്കുള്ളത്. പരിശോധന കർശനമാക്കിയതോടെ കേരളത്തിൽ നിന്നുള്ള വാഹനങ്ങളുടെ വലിയ നിര തന്നെ അതിർത്തിയിൽ രൂപപ്പെട്ടു.

മണിക്കൂറുകളോളം കാത്തുനിന്നു പരിശോധന പൂർത്തിയാക്കിയ ശേഷമാണു വാഹനങ്ങൾ കടന്നുപോയത്. എന്നാൽ ചരക്കുവാഹനങ്ങളും ആംബുലൻസുകളും മറ്റു അത്യാവശ്യ സർവീസ് വാഹനങ്ങളും തടയുന്നില്ല.