ചെന്നൈ: പോലീസ് സ്റ്റേഷൻ വളപ്പിലുണ്ടായ സ്‌ഫോടനത്തില്‍ ഒരാള്‍ മരിക്കുകയും മറ്റൊരാള്‍ക്ക് പരിക്കേല്‍ക്കുകയും ചെയ്തു. സേലം ജില്ലയിലെ സംഗഗിരി സ്‌റ്റേഷനിലെ വാര്‍ഷിക പരിശോധനയ്‌ക്കും ശുചീകരണ ജോലിയ്‌ക്കും ഇടയിലാണ് സംഭവം നടന്നത്, കത്തുന്ന മാലിന്യത്തില്‍ നിന്ന് ഒരു വസ്തു പൊട്ടിത്തെറിച്ച്‌ പ്രദേശത്ത് പരിഭ്രാന്തി സൃഷ്ടിക്കുകയായിരുന്നു.
സംഗഗിരി സ്വദേശികളായ ഹേമത്തുള്ള (45), ഇബ്രാഹിം (25) രാജ്കുമാര്‍ (30) എന്നിവയറിയിരുന്നു പോലീസ് സ്റ്റേഷൻ പരിസരം ശുചീകരണത്തില്‍ ഏര്‍പ്പെട്ടിരുന്നത്. ശേഖരിച്ച മാലിന്യം സ്റ്റേഷൻ വളപ്പില്‍ കൂട്ടിയിട്ട് തീയിട്ടു എന്നാണ് റിപ്പോര്‍ട്. കത്തുന്ന മാലിന്യത്തില്‍ നിന്ന് പോലീസ് സ്റ്റേഷന്റെ മേല്‍ക്കൂരയിലേക്ക് ഒരു ദുരൂഹ വസ്തു വീണ് പൊട്ടിത്തെറിക്കുകയായിരുന്നു. ഗുരുതരമായി പരിക്കേറ്റ ഹേമത്തുള്ളയെ ആശുപത്രിയിലേക്ക് കൊണ്ടുപോകുന്നതിനിടെ മരണത്തിന് കീഴടങ്ങുകയായിരുന്നു. വേറെ ഒരാവശ്യത്തിന് സ്റ്റേഷനില്‍ ഹാജരായ ഭവാനി സ്വദേശി ഭാരത് എന്ന മറ്റൊരു വ്യക്തിക്കും പരിക്കേറ്റു, ഇയാള്‍ ഇപ്പോള്‍ സര്‍ക്കാര്‍ ആശുപത്രിയില്‍ തീവ്ര ചികിത്സയിലാണ്.
സംഭവത്തെത്തുടര്‍ന്ന് പോലീസ് സ്റ്റേഷന് മുന്നില്‍ വൻ ജനക്കൂട്ടം തടിച്ചുകൂടി, സേലം ജില്ലാ എസ്പി അരുണ്‍ കപിലൻ സ്ഥലത്തെത്തി സംഭവത്തെക്കുറിച്ച്‌ അന്വേഷണം നടത്തി. കൂടാതെ, ശുചീകരണ പ്രവര്‍ത്തനത്തിനിടെ ശേഖരിച്ച മാലിന്യങ്ങള്‍ക്കിടയില്‍ പോലീസിന്റെ പ്രാഥമിക അന്വേഷണത്തില്‍, പടക്കങ്ങള്‍ കണ്ടെത്തി, ശരിയായ മുൻ കരുതലുകള്‍ ഇല്ലാതെ കത്തിച്ചപ്പോള്‍ പടക്കങ്ങള്‍ പൊട്ടിത്തെറിച്ചതായി സൂചനയുണ്ട്. സംഭവത്തില്‍ പോലീസ് കേസെടുത്ത് അന്വേഷണം നടത്തിവരികയാണ്.
