ചെന്നൈ: സംസ്ഥാന സര്ക്കാറിന്റെ ഒന്നാം വാര്ഷികത്തോടനുബന്ധിച്ച് വിവിധ ആനുകൂല്യങ്ങള് പ്രഖ്യാപിച്ച് തമിഴ്നാട് മുഖ്യമന്ത്രി എം.കെ.സ്റ്റാലിന്. വാര്ഷികത്തിന്റെ ഭാഗമായി ശനിയാഴ്ച രാവിലെ അദ്ദേഹം സര്ക്കാറിന് കീഴിലുള്ള മെട്രോപൊളിറ്റന് ട്രാന്സ്പോര്ട്ട് കോര്പ്പറേഷന്റെ ബസില് യാത്ര ചെയ്യുകയും യാത്രക്കാരുമായി സംവദിക്കുകയും ചെയ്തു.
ചെന്നൈയിലെ രാധാകൃഷ്ണന് സാലൈ റോഡിലൂടെ സര്വിസ് നടത്തുന്ന നമ്ബര് 29-സി ബസിലാണ് അദ്ദേഹം യാത്ര ചെയ്തത്. സ്ത്രീ യാത്രക്കാരോട് പ്രത്യേകം സംസാരിക്കുകയും അവര്ക്കുള്ള സൗജന്യ യാത്രാ സൗകര്യത്തെക്കുറിച്ച് അന്വേഷിക്കുകയും ചെയ്തു.
അച്ഛന് മന്ത്രിയായിരുന്നപ്പോഴും സ്കൂളിലേക്ക് ഇതേ നമ്ബര് ബസിലാണ് താന് സഞ്ചരിച്ചിരുന്നതെന്ന് അദ്ദേഹം ഓര്മിച്ചു. കഴിഞ്ഞ നിയമസഭാ തെരഞ്ഞെടുപ്പിന് മുന്നോടിയായി ഡി.എം.കെയുടെ പ്രധാന വാഗ്ദാനമായിരുന്നു സ്ത്രീകള്ക്കുള്ള സൗജന്യ ബസ് യാത്ര.
ബസ് യാത്രക്കുശേഷം നിയമസഭയിലെത്തിയ മുഖ്യമന്ത്രി എം.കെ. സ്റ്റാലിന് ഒന്നാം വാര്ഷികത്തിന്റെ ഭാഗമായി വിവിധ ക്ഷേമ പദ്ധതികള് പ്രഖ്യാപിച്ചു. സര്ക്കാര് സ്കൂളിലെ കുട്ടികള്ക്ക് പ്രഭാതഭക്ഷണം നല്കുന്ന പദ്ധതിയാണ് പ്രധാന പ്രഖ്യാപനം. ഒന്ന് മുതല് അഞ്ച് വരെയുള്ള ക്ലാസുകളിലെ വിദ്യാഥികള്ക്ക് എല്ലാ പ്രവൃത്തി ദിവസങ്ങളിലും പോഷകസമൃദ്ധമായ പ്രഭാതഭക്ഷണം നല്കും.
കഴിഞ്ഞ ഒരു വര്ഷത്തിനിടെ വിവിധ മേഖലകളില് സര്ക്കാര് കൈവരിച്ച നേട്ടങ്ങള് സ്റ്റാലിന് എണ്ണിപ്പറഞ്ഞു. ‘ദ്രാവിഡ മാതൃക’യിലാണ് വികസനങ്ങള് നടപ്പാക്കുന്നത്. എല്ലാവരെയും ഉള്ക്കൊള്ളുന്നതാണ് ഇതെന്നും അദ്ദേഹം കൂട്ടിച്ചേര്ത്തു.
ആറ് വയസ്സിന് താഴെയുള്ള കുട്ടികള്ക്ക് പോഷകാഹാരം ഉറപ്പാക്കാന് ലക്ഷ്യമിട്ടുള്ള മറ്റൊരു പദ്ധതിയും സ്റ്റാലിന് പ്രഖ്യാപിച്ചു. ഡല്ഹി സര്ക്കാറിന്റെ മാതൃകയിലുള്ള സ്കൂള് ഓഫ് എക്സലന്സ് പ്രോഗ്രാമാണ് മറ്റൊരു പദ്ധതി. 150 കോടി രൂപ ചെലവില് സംസ്ഥാനത്തെ എല്ലാ കോര്പ്പറേഷനുകളിലും അടിസ്ഥാന സൗകര്യങ്ങള് നവീകരിക്കാനും വിദ്യാര്ത്ഥികള്ക്ക് പുതിയ പഠന അന്തരീക്ഷം കണ്ടെത്താനുമായി നടപ്പാക്കും.
