തിരുപ്പതിയില് വ്യാജ ബോംബ് ഭീഷണി മുഴക്കിയ യുവാവ് പിടിയിലായതായി റിപ്പോര്ട്ട്. തമിഴ്നാട് സേലം സ്വദേശി ബി. ബാലാജി ആണ് പൊലീസിന്റെ പിടിയിലായത്. അലിപിരിയില് വൈകീട്ട് മൂന്ന് മണിയോടെ ബോംബ് സ്ഫോടനമുണ്ടാകുമെന്നും നൂറോളം പേരെ കൊലപ്പെടുത്തുമെന്നുമായിരുന്നു ഭീഷണി.
ആഗസ്റ്റ് 15ന് 11 മണിയോടെയായിരുന്നു യുവാവ് തിരുമല തിരുപ്പതി ദേവസ്ഥാനം (ടി.ടി.ഡി) കണ്ട്രോള് റൂമിലേക്ക് വ്യാജ ബോംബ് ഭീഷണി മുഴക്കി ഫോണ് ചെയ്തത്. ഫോണ് കോളിന് പിന്നാലെ അലിപിരിയില് തെരച്ചില് നടത്തിയെങ്കിലും സ്ഫോടകവസ്തുക്കളൊന്നും കണ്ടെത്താനായില്ല.
ഇതിന് പിന്നാലെ ടി.ടി.ഡി ഉദ്യോഗസ്ഥര് നല്കിയ പരാതിയുടെ അടിസ്ഥാനത്തില് പൊലീസ് നടത്തിയ അന്വേഷണത്തിലാണ് പ്രതിയെ പിടികൂടിയത്. സംഭവത്തില് ഇയാള് കുറ്റം സമ്മതിച്ചതായും പൊലീസ് അറിയിച്ചു.
